林鄭今被質詢 議員發問要鬥快撳掣
[2018.01.31] 發表
【明報專訊】特首林鄭月娥今日將首次到立法會出席為時半小時「短問短答」環節，接受議員就各項議題質詢，每人質詢限時3分鐘，預計林太一個人要「打十個」，應付大約10名議員嘅問題。據知議員到時想提問嘅話就要鬥快撳掣，預料立法會主席會按議員板塊分配發言機會，政府內部預計，民主派會重點狙擊取消立法會補選參選人資格事件，同埋律政司長鄭若驊僭建風波等。
限半小時 料答10人問題
林太早前表明，除咗出席一年4次嘅特首答問大會外，今年1月起會每月額外出席一次短問短答，接受議員質詢，希望改善行政立法關係。按以往做法，一名議員如果喺早前嘅答問大會問過問題，佢喺之後嘅答問大會嘅發問排序就會較後，據知短問短答環節係新事物，所以議員發問排序由零開始計算，即係每人都有機會。
另外，立法會最快今日討論由獨立朱凱廸提出、要求傳召鄭若驊就資訊自由作證同提供文件嘅動議，同埋民主派會議召集人莫乃光要求傳召鄭若驊到立法會解釋僭建風波嘅動議，鄭若驊將缺席兩項動議，列席嘅分別係政制及內地事務局長聶德權同政務司長張建宗。
更多港聞
【明報專訊】浸會大學學生不滿普通話豁免試評分機制欠透明，本月17日到大學語文中心抗議，其間有學生說話中夾雜粗言。事後被停學的學生會會長劉子頎...
詳情
相關新聞
