72歲嫻姐出山掌婦委會 「女飛魚」蔡曉慧成新成員

[2018.01.13] 發表

【明報專訊】兩年前已退任立法會議員嘅72歲陳婉嫻(圖)出山做公職，政府噚日宣布委任嫻姐做婦女事務委員會主席，接替即將卸任嘅主席劉靳麗娟。嫻姐已經有唔少大計，佢同Emily講，當務之急係希望婦委會可以聯同其他組織，幫手處理小朋友被虐待嘅問題，佢話小朋友同婦女關係密不可分。

政府同時亦委任4個婦委會新成員，包括前「女飛魚」、香港游泳代表隊前成員蔡曉慧；瑪利諾修院學校(中學部)校長李錦霞；油尖旺區議員鄧銘心，以及慈善機構「庭恩兒童中心」創辦人黃何淑英。

嫻姐同Emily講，話希望來年可以處理婦女貧窮問題，亦指目前社會有50萬婦女，可能基於唔同原因無法工作，因此希望可以協助佢哋重返社會。嫻姐仲話，好多婦女都自強，希望政府可以支持佢哋。

勞工及福利局長羅致光就話，嫻姐喺公共事務方面擁有豐富經驗，深信喺嫻姐領導下，婦委會將繼續致力促進本港婦女嘅權益同發展。

婦委會喺2001年成立，致力促進本港婦女福祉同權益，亦會就婦女事務方面嘅政策同措施向政府提供意見。

更多港聞

【明報專訊】「法政匯思」成員任建峰（圖）噚晚正式卸任召集人同埋核心小組成員嘅職銜，淡出組織，將時間畀番家人。任建峰話3年前成立「法政匯思」，... 詳情

【明報專訊】仲有一個多月就係農曆新年喇，為咗送雞迎狗，香港郵政喺今個月27號（周六），會喺各郵政局推出一套4枚嘅特別郵票同紀念品，同市民預早... 詳情

【明報專訊】民主派初選聽日舉行，但坊間反應冷淡，各個泛民參選人都各出其謀，希望可以令支持者參與投票。九西初選參選人、民協嘅馮檢基就為市民提供... 詳情