陸頌雄睇本地波 「最好嘅聖誕禮物」
[2017.12.25] 發表
【明報專訊】聖誕假期開始，唔少人都有慶祝活動，工聯會陸頌雄(圖左)噚日就去咗旺角球場支持本地足球，仲呼籲大家入場捧地區球會嘅場。身兼元朗區議員嘅佢入場睇高級組銀牌準決賽，支持陽光元朗，其間玩facebook live猛話場波好精彩，結果元朗喺落後之下，以3:1擊敗衛冕嘅傑志打入決賽。陸頌雄即刻同同場嘅球會主席郭靜然(圖右)豎起3隻手指慶祝，仲話「睇一場好波就係一份最好嘅聖誕禮物」。
陸頌雄自稱好本土，支持本地足球，讚過去幾年球員好努力，康文署場地都靚咗，值得大家入場。佢又話立法會遲啲會討論足球發展政策，大家有意見可以留言畀佢喎。
更多港聞
相關新聞
