林鄭王志民互笠高帽

特首林鄭月娥（左）噚日跑咗幾場活動，上午出席鄉議局國慶酒會，下午就同中聯辦主任王志民（右）一齊出席新聞界慶祝國慶酒會。林鄭早前講過認識王志民多年，喺活動兩人亦好好傾。（馮凱鍵攝）

【明報專訊】香港新聞界噚日舉行國慶酒會，請咗新上任嘅中聯辦主任王志民同特首林鄭月娥做主禮嘉賓。新聞界慶祝國慶籌委會主席張國良喺致辭嗰陣話，王志民其實係新聞界嘅老朋友，事緣王志民曾經喺香港工作10幾年，仲話好榮幸有新特首和新主任同時「閃亮登場」。

林鄭上任之後就馬不停蹄，北上拜會中央同部委，去過東盟國家以至英國外訪，前排去完長沙出席「泛珠三角區域合作行政首長聯席會議」，早幾日先返香港，林鄭噚日講嘢都鼻塞塞，笑住話﹕「今日閃亮登場嘅只有王主任，我就帶病在身。」

林太頻頻外訪患感冒

身為「老香港」嘅王志民之後致辭時大曬廣東話，又不忘大讚林鄭，佢話中央支持之下香港坐擁發展先機，林鄭四出外訪係為香港搵機遇，「真係好辛苦，佢𠵱家感冒，我哋大家畀啲掌聲佢，為我哋香港好打得」。

上任主任後首次出席公開活動嘅王志民，喺活動上多次講廣東話，初見傳媒就話從香港新聞界嘅工作，感受到香港同胞嘅敬業，仲同在場傳媒講「你哋真係好搏，抵讚！」又向廣大市民打招呼，兩度用廣東話講「祝大家(香港市民)國慶節、中秋節愉快！萬事勝意！」

更多港聞

解畫組班難 林太﹕目標人物驚駕馭唔到公務員

【明報專訊】民主思路今年同港大專業進修學院合辦政治領袖文憑課程，佢哋噚日舉行開學禮，請特首林鄭月娥到場致辭。林太講笑話，自己係以受惠者身分出... 詳情

張雲正下月拉埋天窗

【明報專訊】年尾係結婚旺季，Emily聽聞，55歲嘅公務員事務局前局長張雲正將會同「80後」新聞主任呂卓穎（Florence）拉埋天窗，下個... 詳情

接替王桂壎 律師會彭韻僖掌報評會

【明報專訊】香港報業評議會噚日下午召開特別會員大會，議決接受王桂壎律師辭任主席，選出香港律師會副會長彭韻僖（Melissa）做新主席。 ... 詳情