大熊貓盈盈現懷孕迹象 海洋公園：不排除假懷孕 續觀察

樂樂以往被批評後肢力不足，祝效忠話訓練員2011年起已經會用長竹吊起食物餵樂樂，等佢企起身，訓練後肢力量，今年一樣，樂樂同盈盈交配時明顯見到成效，企得耐咗，亦顯得無咁攰。（海洋公園提供）

大熊貓盈盈（右）今年3月31日至4月3日發情，海洋公園陸生動物部高級館長祝效忠話，盈盈2015年上過四川參加全國繁殖計劃，學咗啲經驗，今年識得喺交配時抬起尾部配合樂樂（左）。（海洋公園提供）

【明報專訊】大熊貓盈盈、樂樂由2011年起連續7年嘗試為香港增添熊貓寶寶，唔少人都期待盈盈嘅好消息，不過，海洋公園噚日公布，盈盈雖然喺7月初出現典型懷孕迹象，但可能係假懷孕，要繼續觀察。公園陸生動物部高級館長祝效忠話，樂樂同盈盈今年自然交配咗4次但失敗，估計可能係樂樂唔夠經驗。

自然交配失敗

祝效忠話，盈盈喺今年3月31日至4月3日發情，嗰4日入面都盡力安排佢同樂樂相處，佢哋四度交配。祝話盈盈2015年上過四川參加全國繁殖計劃，學咗啲經驗返嚟，今年識得喺交配時抬起尾部、貼近樂樂，等樂樂容易啲進入。

樂樂以往被批評後肢力不足，祝效忠話，今年明顯見到訓練成效，例如樂樂同盈盈交配時，企得耐咗，亦顯得無咁攰，不過樂樂唔夠經驗，令最終交配唔成功，未來或會考慮送樂樂返四川等佢學習吓。

海洋公園都為盈盈做咗4次人工授精，利用咗樂樂嘅新鮮精液，仲有安安好耐以前抽取嘅冷藏精液。祝效忠話，盈盈今年7月初出現典型懷孕迹象，包括減少食嘢、外陰腫脹、荷爾蒙水平有變等，但上述迹象可能係假懷孕導致，目前暫未有消息，會繼續觀察。

樂樂、盈盈兩個都係今個月生日，海洋公園行政總裁李繩宗話，為咗慶祝，本港居民由今日起至8月27日可享「買二送一」優惠，於售票處或網站買成人門票兩張，即可獲贈小童(年齡介乎3至11歲)門票一張。

更多港聞

動漫節結束 展商稱丁財兩旺 「料營業額逾百萬」

【明報專訊】一連5日嘅動漫電玩節噚日結束，有展商話連日嚟旺丁又旺財，料5日營業額共過百萬元。今年同場首設兒童玩具節，有展商擺攤位賣兒童玩具，... 詳情

行會利益申報 劉業強持16幅地

【明報專訊】政府噚日公布新一屆問責官員同行政會議成員嘅首份個人利益申報。新加入行會嘅非官守成員、鄉議局主席兼立法會議員劉業強，一如所料成為行... 詳情

三跑早年研究：上京坐高鐵無競爭力

【明報專訊】政府近期落力hard sell高鐵一地兩檢嘅好處，之前喺政府新聞處facebook上載圖片，話坐高鐵由香港去廣州，喺唔停中途站下... 詳情

新副局陳帥夫 Call舊同學慢必

【明報專訊】政府噚日下晝公布首批副局長同政治助理任命，人民力量立法會議員陳志全（慢必）喺政府公布消息前幾個鐘，已經率先收到一名「未來副局長」... 詳情