4熱帶氣旋新名 有日本「小熊」

4熱帶氣旋新名有日本「小熊」

[2017.06.15] 發表

【明報專訊】熱帶氣旋名稱好多時千奇百怪，今年就會加入4個新名字，包括「沙德爾」、「舒力基」、「小熊」同「查帕卡」，分別取代「蘇迪羅」、「彩虹」、「巨爵」同「茉莉」。

西北太平洋同南海嘅熱帶氣旋，由世界氣象組織颱風委員會成員國命名，14個成員國或地區各提供10個名，組成共有140個名嘅名單，輪流使用，而每個名都有獨特嘅意思。好似西太平洋島國米克羅尼西亞提出嘅「沙德爾」，係傳說中可靠嘅守衛；朝鮮提出嘅「舒力基」係一種鷹；日本提出嘅「小熊」代表小熊星座；而馬來西亞提出嘅「查帕卡」就係一種芬芳嘅花。

襲港「苗柏」係鴿

早兩日襲港嘅颱風又點解叫「苗柏」呢？原來「苗柏」一名係由馬來西亞提供，係當地人鍾意飼養嘅一種鴿子，頸部有斑點，常見於郊外同荒地。

而根據慣例，颱風委員會會將曾造成重大人命傷亡同經濟損失嘅熱帶氣旋除名。例如今次除名嘅「巨爵」同「茉莉」就分別喺2015年10月及12月吹襲菲律賓，共造成最少27人死亡、接近100萬人搬離家園。