【明報專訊】教育局長吳克儉任內經常外訪公幹，不時被立法會議員批評，早前教育局回覆立法會查詢時就透露，吳克儉上任至今外訪嘅飛行里數達21萬；目前距離梁振英政府卸任只係淨番兩個幾月，吳克儉則繼續外訪交流，今次佢會去越南兩日，商討將「一帶一路」獎學金計劃擴展至越南嘅協議同具體安排。

探討兩地高等教育合作

吳克儉上星期四(20日)先去完上海同杭州，同當地官員探討兩地高等教育方面嘅合作。返港都未有一個星期，局長聽日就會去越南，話要同當地教育官員，以及大學探討加強兩地高等院校嘅合作機會。除咗去大學，佢仲會參觀一間高中及一間服裝工廠。吳克儉任內外訪超過50次，唔知喺卸任前佢仲會外訪幾多次呢？

另外，吳克儉噚日到訪南區，同當區區議會見面，隨後探訪酒店及旅遊學院，以及香港仔工業學校，同師生分享最新嘅教育發展。