史美倫行會出席率最低
[2017.04.01] 發表
【明報專訊】行政會議作為特首「內閣」，為特首出謀獻策，特首辦近日回覆議員查詢，披露現任行會非官守成員過去3個年度(2014年4月至2017年2月)嘅出席率，金融發展局主席、近月身兼林鄭月娥競選辦主席團成員嘅史美倫(圖)，繼續出席率最低，只有70%，至於一國兩制研究中心總裁張志剛最勤力，出席率100%，比行會召集人林煥光(98%)高。
立會點人數耗190萬元
新民黨主席葉劉淑儀舊年12月辭任行會選特首，特首辦文件就顯示，葉太由2012年10月出任行會非官守成員起，出席率係88%，呢個數字喺現任非官守成員中，大約排中游位置。
另外，唔少建制派立法會議員關注議會拉布情况，立法會秘書處回覆查詢話，喺2016/17年度(截至今年2月底)，立法會大會共36次要求點算法定人數，耗時6小時44分鐘，而秘書處為立法會同轄下委員會會議提供服務嘅每小時平均開支估算係28.2萬元。Emily屈指一算，呢36次點人數就花大約190萬元。至於因流會而減少嘅會議時間就有19小時42分鐘，秘書處強調，因為流會即係會議時間縮短，所以無額外開支。
更多港聞
【明報專訊】前廉政專員湯顯明被投訴喺在任期間涉嫌貪污嘅案件，由2013年5月廉署展開刑事調查近3年，律政司舊年決定不起訴。但湯用公費買茅台同...
詳情
相關新聞
