黃宗澤想破傳緋聞紀錄 1拖24靚女 奉旨花弗

黃宗澤想破傳緋聞紀錄 1拖24靚女奉旨花弗

[2017.02.28] 發表

【明報專訊】黃宗澤(Bosco)昨日一拖24位靚女，包括黃翠如、鄭希怡、楊柳青、馮盈盈、劉穎璇、張寶兒、朱智賢、林泳淘等，出席劇集《溏心風暴3》宣傳活動，介紹他飾演李司棋的富豪弟弟花弗一面；其間，有份客串的馬浚偉出場爭女，指黃翠如原本是他的所愛。

Bosco表示這是從影以來最多靚女圍住自己的劇集，不敢想像有多少場牀戲，但肯定對手都是好身材的女仔，自己也要操肌應付露肉場面。他風騷地說：「韋小寶都是得7個老婆，我有廿幾個，相信會很好玩。可能知我是最後一次用無綫藝員身分演出，所以對我好一點！」

毋懼日模女友呷醋

問到怕不怕傳緋聞？他笑稱：「要傳就全部都傳，我希望破傳緋聞紀錄！」有否擔心日模女友Jun呷醋？Bosco表示：「黐線啦！我拍戲專業的，她睇到先算！」

馬浚偉一出場即死

馬浚偉透露劇中與黃翠如演情侶，但他一出場就死，因為掙錢買樓致心臟病發，翠如其後情傾好兄弟Bosco。馬浚偉說︰「監製劉家豪回巢搞大製作，我想支持一份，但我同時拍緊《深宮計》，所以只能客串4場。」黃翠如指劇中只有為馬浚偉哭墳，無緣親熱感到可惜。馬浚偉自言是基督教徒，拍死亡戲無禁忌，反而最近為《深宮計》日拍20小時，擔心眼睛的舊患：「以前拍《天機算》被馬匹弄傷，我的右眼球比正常陷入了3mm。現在工作長時間眼皮就現坑紋，擔心眼睛凹陷惡化，故打算睇醫生。」

鄭希怡拍親熱戲不備案

已為人母的鄭希怡相隔10年再拍無綫劇，今次會以性感造型跟Bosco親熱，無打算向老公備案。她笑說：「難得可以撇甩老公，部劇在香港取景，時間上方便我回家湊女。」性感騷胸的楊柳青是Bosco劇中女友之一，不拒抗拍激情戲，她說：「接受，他靚仔嘛！」她的角色又是武打演員，故有些動作演出。

記者：鍾一虹

攝影：梁迺楠

■更多娛樂猛料 ﹕ol.mingpao.com