【明報專訊】喺去年立法會選舉中，因為一幕「娥頸橋之戀」而一舉成名、自稱係「網絡紅人」嘅陳玉娥，噚日親自舉行香港首場特首選舉論壇，可惜娥姐同4個熱門參選人都「有緣無分」，4個參選人都無現身。娥姐特別不滿參選人曾俊華唔睬佢，仲話可能因為自己日前去曾辦踩場示威過，所以搞到曾俊華日前去報名交提名時差啲仆親。 其餘3人競選辦無一口拒絕 娥姐話，之前聯絡胡國興、葉劉淑儀同林鄭月娥，邀請佢哋出席論壇時，3人嘅助手都無一口拒絕，只係話「唔一定來」，形容3人競選辦「好nice」；但曾俊華競選辦一開口就講明唔會出席，而且唔肯留電話畀娥姐同曾俊華「互動」，所以搞到娥姐好嬲。娥姐噚日仲特登放咗一筒薯片喺枱面，以示不滿。 自稱網絡紅人 「情歌王子」助興 呢場喺政府總部外舉行嘅選舉論壇雖然搞唔成，但娥姐都好識做，安排咗一個「情歌王子」唱歌表演，仲有外籍人士表演跳舞。娥姐心情完全無受影響，非常風騷，仲好客氣咁同Emily講要遲少少先可以做訪問，因為佢要同表演嘉賓合照。 另一方面，噚日有一班自稱「關心香港未來的市民」，成立咗「全港反林鄭大聯盟」，反對林太成為特首，但Emily所見，呢個大聯盟活動參加者只有小貓數隻。 不過，大聯盟話會一連4個星期日，下午3點至5點，去金鐘「連儂牆」靜坐集會。
|
| |
| |
;){kind=small}
