「收到國家指示」 新思維前成員參選特首
[2016.10.01] 發表
【明報專訊】下屆特首選戰已經有人宣布參選！不過咁爆炸嘅新聞，就無咩人報，只係得《成報》噚日有報道。宣布參選嘅人叫邱勛(圖)，係新思維前成員，唔講真係無人識。不過更加爆嘅係，佢自稱係國安人員，早排接到國家指示要求佢參選明年特首選舉。佢仲話，有中央嘅支持，拎到150個選委提名無問題。
唔好以為佢講笑，邱勛同Emily聲稱自己嘅國安身分有證據，話自己喺內地可以登錄早已退出中國市場嘅Google介面，而佢過去做過嘅軍事任務，就包括喺新思維做臥底，了解對方運作。佢又話，2012年底曾經喺北京見過中央辦公廳主任栗戰書，之後就有對方身邊嘅人一直聯絡自己。
邱勛話，已經接獲內地消息，政治局常委已經開會決定特首梁振英唔能夠連任，中央又希望佢參選可以令財政司長曾俊華等其他有能之士盡快表態參選。佢強調自己唔係發神經，話曾經喺政府工作十幾年，之前亦喺內地顧問公司工作，衣食無憂，只係因國家需要而企出嚟。至於佢講嘅內容有幾真，就見仁見智啦。
更多港聞
相關新聞
