【明報專訊】立法會選舉仲有兩星期投票，政黨都好着緊支持者會點投票，民建聯「四老」﹕立法會主席曾鈺成，議員譚耀宗、葉國謙同陳鑑林唔再競逐連任，就落力為黨友拉票，又為該黨拍片，呼籲支持者一人兩票都投民建聯。 曾主席喺條片度好肉緊咁呼籲支持者，兩票都投畀民建聯候選人。民建聯喺新界東、新界西都分別派出兩張名單，可能驚選民混淆，譚耀宗特別提醒，每張選票都要支持民建聯，但蓋一個印就夠喇。 工聯會宣傳片有劉錫賢 除咗呼籲，條片仲教市民投票程序，包括選票應該入邊個票箱，地區直選嘅選票就入去藍色票箱；「超級區議會」議席選票就入白色票箱。之後又詳細講解唔同地區嘅支持者，應該點樣「分票」畀該黨候選人。 工聯會亦推出宣傳短片，仲搵咗亞視前藝員劉錫賢幫手，劉錫賢喺片中話，多得工聯會一直幫手，先可以咁快拎得番啲血汗錢。片中又有男士話工聯會幫大家爭取到合理工資；另一男仔就話喺工聯會就業中心搵到自己就業方向喎。條片主要都係sell工聯會「與市民同心，與社會同步」，但就未有提及任何候選人或立法會選舉嘅事。
|
| |
| |
;){kind=small}
