青政政綱倡能源自給自足 游蕙禎畀香港天然氣考起

[2016.08.22] 發表

【明報專訊】梁頌恆：350公里外有氣田

青年新政喺政綱上提到「透過開發香港專屬經濟區內的天然氣」，令香港可以喺能源方面自給自足，之但係香港邊度有天然氣呢？民主黨黃碧雲團隊嘅袁海文喺選舉論壇上，追問出選九龍西嘅青年新政游蕙禎呢個問題，但游一直答唔出，因此被對手批評係天馬行空。

或者先提番讀者，𠵱家香港嘅天然氣全部都係靠進口嘅。Emily發現原來青政新界東候選人梁頌恆都有同樣政綱。梁頌恆同Emily解釋，香港東南方350公里外有個氣田，將來如果可以用政治手法，或者用商業手法，將氣田供畀香港用，就可以做到自給自足。不過，梁頌恆都話「無專屬經濟區就咩都無得講」。

無綫噚日播出九龍西選舉論壇，袁海文多次質問游蕙禎嘅政綱，但游就答唔出香港邊度有天然氣。袁乘機話候選人唔好天馬行空，最重要係實事求是。

被批天馬行空

講番論壇，大家討論嘅議題仲包括全民退保、港獨、經濟民生等。不過，疊聲爭辯嘅情况都幾嚴重，候選人大都無視「主場」規定，好多人喺人哋主場時都爭住講話，搞到個論壇聽得最多嘅，就係主場候選人要求其他人收聲。

九龍西其他候選人包括吳文遠、何志光、毛孟靜、梁美芬、譚國僑、朱韶洪、黃毓民、林依麗、蔣麗芸、關新偉、劉小麗、李泳漢、狄志遠。新界東名單見「聞風筆動」。

更多港聞