王維基站台 李梓敬反CY發毒誓

王維基站台李梓敬反CY發毒誓

[2016.08.17] 發表

【明報專訊】參選新界東嘅自由黨李梓敬，喺港大滾動民調排名一直徘徊邊緣位置，佢噚日就請嚟港島候選人、自由黨創黨前黨員王維基站台。兩人政綱都係反對特首梁振英連任，王維基噚日更進一步，問李梓敬如果一齊入到議會，李梓敬會唔會支持自己「動議」拉梁振英落台呢？

張超雄手語短片介紹政綱

雖然王維基無講明以咩形式「動議」，但李梓敬表明支持，強調唔會臨陣退縮，如果反口就永遠無緣議席，「傾家蕩產、孤獨終老、天打雷劈」，又當住王維基同一眾傳媒舉三指發誓。

李梓敬無正面回應係咪因為民調低開，所以邀請王維基站台，話自己一直認為要聯合相同路線嘅人，壯大議會力量，先可以「槍口一致對付」梁振英。李梓敬強調民調有局限，相信自己出席選舉論壇後，支持率已經慢慢上升。

另邊廂，同樣出選新東嘅工黨張超雄，噚日喺facebook專頁上載「無障礙政綱」短片，闡述政綱，旁邊就有一名女士輔以手語解釋，相當體貼。至於競逐連任港島嘅葉劉淑儀噚日亦上載宣傳短片，見到葉太探訪小商戶同家訪，佢又透露曾經去一個老伯屋企住一晚，體驗港鐵噪音問題。

新界東其他候選人包括方國珊、林卓廷、廖添誠、陳云根、梁國雄、楊岳橋、麥嘉晋、鄭家富、葛珮帆、侯志強、鄧家彪、范國威、陳玉娥、黃琛喻、李偲嫣、陳志全、梁頌恆、梁金成、容海恩及陳克勤。港島其他候選人包括黃梓謙、劉嘉鴻、何秀蘭、張國鈞、詹培忠、鄭錦滿、羅冠聰、沈志超、徐子見、司馬文、許智峯、陳淑莊、郭偉強。

更多港聞