【明報專訊】被認為有意參選特首嘅新民黨主席葉劉淑儀，至今未有就跑馬仔表態，都係話要專注目前參選港島區立法會選舉先。不過，葉太噚日就喺facebook撰文，大談官員選特首嘅政治倫理問題。 葉太話，唔少司局長已被追問係咪有意參選特首，其中一人最近動作頻頻，例如去母校演講，又獲校友鼓勵，近日更公開表示，若自己能對社會有所貢獻，就會考慮出選，似乎有意問鼎來屆特首之位。相信唔使開名，大家都知道葉太講緊嘅係財政司長曾俊華啦。 葉太話，法律上只要年滿40歲、居港滿20年就可以選特首，但若身為現任司局長，「政治倫理上卻是大有問題」。 特首班子唔可以有「異志」 佢話特區政府主要官員係由特首提名、中央任命，如果司局長有意選特首，應及早向特首同中央政府表明其志，清楚交代，並正式提出請辭，因為作為特首班子之一，應同特首同心同德，唔可以有「異志」，如果任期未滿，但又有意「謀其長官之位」，政治倫理上係講唔通。 葉太又話，身為班子要員，同特首候選人有衝突之嫌，因官員「前呼後擁」，身邊都係公帑出糧嘅政治助理同公務員，手上有龐大資源，且掌握實權，又得到傳媒關注，所以有意參選嘅官員應及早辭職，減少不公平。唔通葉太覺得有官員有政治資源「助選」，令佢輸在起跑線，所以要求有關人士盡早辭職？咁現任特首都有「前呼後擁」，唔知又點計呢？ 港島區立法會參選名單﹕黃梓謙、劉嘉鴻、葉劉淑儀、何秀蘭、張國鈞、詹培忠、鄭錦滿、羅冠聰、沈志超、王維基、徐子見、司馬文、許智峯、陳淑莊、郭偉強。
|
| |
| |
