【明報專訊】選管會裁定參選新界東嘅梁天琦提名無效，搞到噚晚喺九展舉行嘅候選人簡介會火藥味甚濃，除咗有人上台抗議，台下亦有唔少衝突；好似參選新界東嘅正義聯盟李偲嫣，就同出戰港島嘅「四眼哥哥」鄭錦滿一度近距離指罵。

李偲嫣同鄭錦滿原本坐喺會場唔同位置，其間兩人突然激動地走近對方，仲跳上櫈並向對方指罵，現場保安不斷勸兩人「坐番低」。李偲嫣一度以手掩面暗示對方「口臭」，二人企得近到幾乎胸貼胸對峙，而在場者就食晒花生，喺緊張嘅氣氛下突然齊聲高呼「咀佢」、「咀佢」，但亦有人叫鄭「唔好犧牲」喎，呢段小插曲算係緩和咗少少氛氛。

李偲嫣喺場外同樣被圍攻，佢一度指自己嘅選舉經理同主任入唔到會場，拎住個電話周圍向保安同警員求救，不停穿插會場內外，結果場外示威者一見到佢又再起哄。

金融界陳振英到場學嘢

另外，唔少建制派候選人噚日都只委派選舉經理到場聽簡介會，因為聽選舉條例同抽籤都係簡單嘅例行公事。不過Emily就撞到無對手、料自動當選嘅金融界議員陳振英(Ronick)，佢仲要係排頭幾位。佢笑言今次都係學習過程，所以聽吓無妨；又因為噚日上晝仲打緊8號風球，費事勞煩義務幫手嘅競選助理，所以選擇親身到場。不過，由於Ronick早咗近一個半鐘到場，作為平時可能甚少等人嘅高層，噚日都要喺會場外等待。

(詳細參選名單見附表)