CY雙曾網上發功 梁讚跳繩隊 財爺籲勿放棄香港

特首梁振英同財爺曾俊華噚日都有喺facebook出post，梁祝賀香港跳繩隊破咗世界紀錄（圖），得到嘅嬲符號比讚符號多。（CY Leung facebook）

自由黨田北俊日前喺facebook評論特首選舉，曾鈺成就同田少隔空對話，留言話「薯片叔叔出，我梗係走夾唔抖啦！」；田毛毛就回應叫曾主席唔好走。（田北俊facebook）

【明報專訊】立法會進入選舉期，明年3月舉行嘅特首選舉，似乎亦準備開跑，財政司長曾俊華、立法會主席曾鈺成上星期五一齊轉口風，講到會考慮參選。噚日幾名疑似特首參選人，就喺網上發功，好似有啲隔空較勁嘅味道。

喺足球「中港大戰」中無表態撐港隊嘅特首梁振英(CY)，噚日就為運動員打氣，第一句就話「港隊好嘢！」CY祝賀香港跳繩隊喺世界跳繩錦標賽上刷新世界紀錄，成為世界冠軍，又話比賽至今，港隊已奪得多面金、銀及銅獎牌，可喜可賀。不過似乎網民就唔多like，呢個facebook post大半日已有逾3300個網民畀「嬲嬲」，但亦有700多個like。

曾俊華就喺網誌講番前日出席「永不放棄同學會」畢業禮時，佢用母校喇沙嘅口號「never say die」嚟形容不放棄，而唔用「never give up」，鼓勵同學仔無論結果係點，都要記住「永不放棄」。佢話希望可以鼓勵香港人，「即使對香港的情况感到憂慮和氣餒，甚至認為眼前的困局難以突破」，都要抱着永不言敗、never say die嘅香港精神，「不放棄自己，也不放棄香港」。財爺又將前日活動嘅短片放上fb，一日內未有人畀「嬲嬲」，唔少網民留言表明支持佢選特首。

田少曾鈺成一唱一和

至於曾鈺成，就同擺明反梁嘅自由黨田北俊一唱一和。話說田少日前喺fb貼咗張寫有「如果CY下界(屆)仲係特首，我唔X叫曾鈺成！」嘅惡搞圖，網民食晒花生之餘，曾主席亦留言話﹕「薯片叔叔出，我梗係走夾唔抖啦！」田少fb則回應稱﹕「咪走住，我驚薯片叔叔咁單純，一個人搞唔掂喎。」唔通政圈所指嘅「雙曾配」，係講緊曾主席為財爺開路？田北俊已報名參選新東，該區有24張名單。

更多港聞

長號小提琴二胡都OK 國泰港龍放寬帶上機樂器尺寸

【明報專訊】舊年港鐵唔畀女學生帶古箏入閘成為城中熱話，國泰同港龍亦試過唔畀乘客攜帶樂器上機，必須寄艙，結果整爛埋樂器。國泰同港龍噚日就宣布放... 詳情

鄺葆賢辦「小精靈選舉」 講篩選

【明報專訊】Pokémon GO登陸香港近一星期，有公司喺商場「放櫻花」（lure module）吸客，有立法會參選人借精靈宣傳，有區議員就... 詳情

分享平台鼓勵發掘好事Like HK

【明報專訊】香港地方細細，其實有好多吃喝玩樂好地方。零售、旅遊及餐飲業等界別人士就自發搞咗個「WE LIKE HK」分享平台，話要喚起全港市... 詳情

交友公司搞「訓練員派對」 反應差

【明報專訊】Pokémon GO 熱潮襲港，唔少公司食住個勢吸客，例如有商場開lure module（小精靈誘餌），吸引訓練員到場，不過如意... 詳情