馮敬恩兩戰死神有感 「常自問有冇嘢未做」

馮敬恩兩戰死神有感「常自問有冇嘢未做」

[2016.06.07] 發表

【明報專訊】香港大學學生會前會長馮敬恩(圖)喺去年副校任命風波中，帶領同學衝擊校委會，並泄密公開校委會討論內容；原來「勇武」背後，馮敬恩曾兩度對抗死神，喺中一同中四分別證實患上血癌和腦血管病。童年時兩次重病，馮敬恩話體會生命脆弱，「以為自己好有能力，但唔係囉」，明白到死亡係每個人必經階段，所以會問自己「有冇嘢未做？做夠未呢？」，然後可以坦然接受最後終點。

患血癌腦瘤怕損智力

馮敬恩接受商台節目《雲常開》訪問，憶述小時候同血癌搏鬥經歷。佢話小六升中一嘅暑假發現患血癌，當時感受係「都知嚴重性，六合彩又唔見我中，點解會係我？」馮話有感到憂慮，因為唔知點醫，加上知道自己嘅病會對屋企造成負擔。不過佢話當時無諗過死亡，但覺得治療期間會好痛，仲諗到會甩頭髮。

當時點樣捱過化療康復？馮敬恩話媽媽經常喺病房陪伴傾偈同讀聖經，亦有聽電台節目，有啲精神寄託。但好景不常，馮敬恩中四時被診斷有腦血管瘤，「又嚟，搞幾耐？」係佢第一個反應，佢亦開始思考死亡，又笑言當時有擔心智力會受損。後來佢接受手術並康復。

點樣安慰遇上困難有輕生念頭嘅朋友？佢話旁人最重要係聆聽，「佢哋無地方宣泄，到最後先會用行動去宣泄自己對生活嘅不滿」。

更多港聞