指以為否認就可擊退指控 曾鈺成寫「公關災難」：有人永遠唔明

指以為否認就可擊退指控曾鈺成寫「公關災難」：有人永遠唔明

[2016.05.10] 發表

【明報專訊】立法會主席曾鈺成嘅專欄文章不時都意有所指，噚日佢就以「公關災難」為題，指回應負面報道時，及早道歉往往係最佳嘅回應策略，但「有的人永遠不明白這條道理，以為只要矢口否認，就可以擊退任何敵意的指控」。曾主席並無提出具體例子，但相信讀者都心領神會喇。

曾鈺成喺文中話，真正嘅公關災難，即係當事人用咗拙劣嘅公關手法而令自己陷入困境；而另一種常見嘅公關災難，就係公眾人物或者機構陷入不利處境，或涉入負面新聞時，嘗試用公關手段解困，但弄巧反拙「愈描愈黑」。佢話，回應負面報道常見策略包括「否認」、「迴避」、「解釋」、「道歉」，最近有事例說明，及早道歉往往係不利處境中最佳嘅回應策略，甚至可以贏得民意。

曾主席就話，有啲人就永遠唔明，以為矢口否認就可以擊退指控，一旦被認為講嘅同事實不符，即使只係微末枝節，都會爆發公關災難，「墮進誠信破產的深淵」。

馮煒光數CY醜聞形容「人格謀殺」

另邊廂，新聞統籌專員馮煒光噚日喺報章專欄撰文，為特首梁振英護航。佢形容香港過去5年一直發生「一件人格謀殺案」，而被「謀殺」嘅係梁振英。文中列出CY過去幾年嘅醜聞，好似2011年時有報章大篇幅報道話梁振英有婚外情，佢形容係人格謀殺嘅開始；之後就列舉過去有人批評CY同地產商有千絲萬縷關係，又有被指涉黑同曾收受澳洲上市公司UGL 5000萬港元等。

馮煒光話，人格謀殺CY源於啲人對政府施政理念、政策同措施挑唔出大毛病，所以就對人不對事喎。唔知一眾讀者又同唔同意佢嘅講法呢？

更多港聞