【明報專訊】立法會近年「拉布」成風，泛民花樣百出，喺早前拉倒俗稱「網絡23條」嘅版權條例可謂「成功例子」。面對「拉布」經常發生，可能建制派唔識都睇到識，民建聯蔣麗芸(Ann姐)噚日就喺facebook上載新片，親自拆解泛民「拉布」五大招數。 話靠建制撐住 佢話，泛民第一招係「牛皮燈籠」，即係「點極都唔明」，一條問題可以問幾日，無論官員點答，議員都扮唔明；第二招就係「亂咁修訂」，例如削減官員薪金，1000、900、800蚊咁逐項減；第三招「死唔斷氣」，講極都唔完，唔畀建制否決；第四招就係經典嘅「休會、終止辯論」，要求當日唔開會，或者直接將議程移走。佢形容最後一招最犀利，就係「打鐘點人」，Ann姐話反對派有20幾個人全部唔出席，靠建制撐住，如再有一兩個病咗，往往搞到流會就係咁解。 雖然Ann姐講得「拉布」頭頭是道，不過噚日立法會審議財政預算案，就依然鐘聲不斷，泛民又繼續提出休會動議。雖然建制派都睇通泛民有咩招數，但似乎仲未識見招拆招，未能阻止「拉布」。
|
| |
| |
;){kind=small}
