【明報專訊】Emily呢排見有「金句王」之稱嘅歌手黎明就嚟開演唱會，最平門票聽講成千蚊一張．但Emily見噚晚黎明去咗另一場音樂會唱歌，門票只係300蚊咋！點解咁抵？原來呢場係籌款騷，名為「樂韻警聲為公益2016」慈善音樂會，慶祝警察學院成立10周年同警察樂隊成立65周年，亦係「欣賞香港」運動活動之一。 兩場音樂會係噚晚同今晚舉行，嘉賓分別係黎明同李克勤，演出單位當然有警察樂隊，仲有著名薩克管(Saxophone)演奏家謝德驥教授、香港中樂團敲擊助理首席錢國偉、油麻地街坊會學校合唱團等。 380萬資助特殊教育需要兒童 Emily聽講，警隊係噚日下午搞咗場免費場，畀超過1300個來自弱勢社群、非政府機構、耆樂警訊同少年警訊嘅會員，同埋中小學生到場欣賞。 兩場音樂會共有3200張門票，成功籌咗380萬，收益全數捐贈香港公益金，資助特殊教育需要兒童服務。Emily最有興趣知道黎明係音樂會有無再爆金句，會唔會用金句如「核心嘅外圍係核心嘅內圍」去解釋下警察核心保安區，定係會叫阿sir記住空肚吃早餐呢？
|
| |
| |
