秋生批成本考慮電影好壞：是外行 唔識嘢

秋生批成本考慮電影好壞：是外行唔識嘢

[2016.04.09] 發表

【明報專訊】黃秋生昨日以戲藝界主席身分出席中環大會堂舉行的《第十屆華文戲劇節》開幕禮，他開心政府將工廈改作表演場地，但也希望政府能多撥款予藝發局，因為現在捉襟見肘，要睇餸食飯，搞到藝術家面青口唇白！

未睇《十年》好想睇

秋生睇好張學友和林嘉欣得影帝、影后，結果輸了，秋生說：「我現在都認為學友和嘉欣應該攞影帝、影后，雖然不認同賽果，但要尊重，因是1000人選出來的。」他笑謂揀學友和嘉欣，因為他水平高，其他水皮。至於備受爭議的最佳電影《十年》，秋生未睇，不過，好想睇，他說：「好奇想睇吓，小時候我鍾意睇禁書、禁片。」對於張同祖的言論，秋生謂祖哥一向有正義感，是個很好的前輩，他也不認同低成本拍不出好電影的說法，他說：「那一些低成本的歐洲電影要執笠，不是低成本的電影就一定唔得，唔低成本就一定得，這不是理據，正如戲劇，不是金碧輝煌就是好，不是考慮因素，如果用這些作考慮因素，就是外行，唔識嘢。」

對於有指政治騎劫了專業？秋生認為當中有很多情緒因素，非只政治原因，他以前看過評審的記錄，本來考試考包尾的，因為有進步，考28而獲獎，考第一的就冇獎，是荒謬理據，有些因同情而給予獎項，他說：「不過，玩個遊戲，就要尊重機制，至於有人說改機制，每個機制都有不足的地方，1000人玩的遊戲，4、5個人覺得有問題，這4、5人可以自己去搞，我一個人搞也可以，左手頒獎給右手，每天都可以是影帝，有問題要提出，覺得不公平就講哪裏不公平，然後開會，坐着謾罵是沒用的，改變不到任何事！」

記者：柯美