民建聯申公帑搞交流 劉江華被質疑鬆章

民建聯申公帑搞交流劉江華被質疑鬆章

[2016.04.07] 發表

【明報專訊】民政事務局每年撥唔少公帑畀團體申請資助搞吓交流團，等青年有機會去內地、海外見識吓。民政事務局回覆議員財委會特別會議嘅提問時就透露，接受資助去內地嘅交流團多達2.5萬次，但去海外就只得140個，難怪畀民主黨主席劉慧卿直斥唔公道。

卿姐噚日喺財委會特別會議上話，政府雖然話政黨都可以申請，但「我都無得去，我個黨點申請？我個黨好多人都無得去(內地)」，意指佢同唔少黨友連回鄉證都無，又點帶團返內地呢？民政事務局長劉江華就話申請係公開嘅，歡迎唔同政黨申請。

民主黨黃碧雲就追問，申請公帑嘅多數係建制團體，仲留意到青年民建聯過去3年申請到政府成240萬搞交流團，質疑青年係咪都要加入民建聯先去得呢，而劉江華作為民建聯成員，或者會令審批者向民建聯「鬆章」。

劉江華就話，就算民主黨申請，當局都非常歡迎，但強調自己無參與審批，亦唔清楚每個團體點樣揀人參與交流團。民建聯主席李慧琼聽到黃碧雲咁講，亦趁自己提問時澄清，指民建聯一直身體力行支持年輕人要多交流，所以申請政府資源，參加者唔需要係民記成員，佢哋通常會透過大專院校等學生報名，仲建議民主黨都考慮申請公帑，「見你哋地區都搞好多旅行團」。此話一出搞到碧雲立即澄清，強調地區旅行團不涉公帑。

更多港聞