財爺李斯特城球隊喻港 陳德霖：AlphaGo證FinTech潛力高

財爺李斯特城球隊喻港陳德霖：AlphaGo證FinTech潛力高

[2016.03.22] 發表

【明報專訊】財政司長曾俊華噚日出席《明報》舉辦嘅「香港新機會——十三五規劃的挑戰」高峰論壇，喺答問環節被主持人問到，如果用一隊球隊形容香港，應用邊一隊？財爺好似有備而來，不假思索就笑言會用英超球隊「Leicester」(李斯特城)。咁點解要用呢隊嚟形容香港呢？佢就只叫「大家做啲研究」，故作神秘無再解答。

「Leicester」即係目前英超榜首隊伍李斯特城，被喻為「神奇球隊」。經過31場英超賽事後，李斯特城由季前嘅5001倍奪標大冷門，漸成為目前嘅1.35倍大熱門。唔知財爺係咪想話香港都係「神奇」之都？

Emily聽聞，財爺出席高峰論壇之前，新聞秘書往往為佢「貼吓題」，準備點樣回應嘉賓提問，估唔到貼中咗上述問題。

另外，金管局總裁陳德霖喺同場論壇發言時話，留意到早前韓國棋王李世石同Google開發嘅電腦圍棋軟件AlphaGo對戰，話從中領悟到科技已經發展到難以想像嘅地步，金融科技(FinTech)嘅潛力實在不容忽視。

陳德霖話，國際象棋比賽早已出現電腦大勝人類嘅例子，但圍棋嘅棋局變化萬千，複雜過國際象棋，而今次AlphaGo戰勝李世石，代表人工智能可培養出人嘅直覺，並從數以百計嘅模擬棋局中提升經驗，佈局令人拍案叫絕。陳德霖覺得李世石慘敗，其中一個原因係緊張、有心理包袱，但AlphaGo無心理波動，因此可高度專注。陳德霖講咁多，無非係想講，科技一日千里，而金管局都要與時並進，推動FinTech發展。