【明報專訊】本土民主前線(本民前)梁天琦噚日喺商台節目談論「本土」定義，指本土和非本土基本區分係「香港人會否有權自決前程」。唔少政黨團體都強調要爭取「本土」權益，財政司長曾俊華亦多次談及「本土」問題，梁天琦就直指社民連及人民力量都唔係「本土派」，因為佢哋認同「中華」、「中國人」身分，「我哋呢班人踏足本土，真係會完全拋棄舊有身分認同，會有香港人身分認同」。 問到可否單以「港獨」區分，梁天琦認為不可行，話最基本區分係「你認為自己係邊一個地方嘅人」，當中國利益同香港利益有衝突時「邊個行先」，以及香港人會否有權利自決前程。 對於曾俊華，梁天琦話「唔想點樣評價佢」，認為曾俊華看「本土」並唔透徹，只係用「本土」觀點推行一啲公共政策，講討好香港人嘅說話，要到真正斟酌點、即可否自決時，先知道對方係咪立足「本土」，「如果你話自己係本土派，但又走出嚟話香港唔可以自決，咁你講乜嘢立足本土呢？點樣真係為香港人福祉從政呢？」
|
| |
| |
