赴台灣觀選 各黨派齊「打卡」

赴台灣觀選各黨派齊「打卡」

[2016.01.16] 發表

【明報專訊】政界多赴蔡英文晚會

台灣總統選舉今日舉行，Emily噚日都講過，香港無論係左、中、右嘅政界人士，唔少都飛去台灣觀察今次大選，即使係跟唔同考察團去嘅，都不時會偶遇。噚日，民進黨蔡英文、國民黨朱立倫分別喺台北同新北舉行造勢晚會，可以話係其中一個必去行程，唔知係咪蔡英文贏面大，Emily所見，絕大部分去觀選嘅，噚晚都喺蔡英文嘅造勢晚會度「打卡」、擺相post上facebook。

公民黨梁家傑、人民力量袁彌明等，噚日紛紛喺fb打卡，話自己去咗蔡英文造勢晚會。其實，今次去台灣觀選嘅唔止泛民中人，好似工聯會陳婉嫻、經民聯梁美芬等亦去咗台北。梁美芬噚日喺facebook上載一張相，話去觀選就遇到梁家傑、嫻姐、民主黨黃碧雲等人，十分熱鬧。

單仲偕嫻姐傾兩岸政治

噚日朝早，公民黨、民主黨、工聯會嘅議員去咗國民黨立委競選總部。民主黨單仲偕話，有同嫻姐討論兩岸政治發展。至於有無講《施政報告》，單仲偕就話，佢未開口嫻姐已同佢講「勞工咩都無」。