王浩信讚Bobby真才子 篤波談心講囡囡
【明報專訊】歐陽震華(Bobby)與王浩信於無綫台慶劇《東坡家事》中，分別飾演才子「蘇東坡」及「秦少游」，劇中Bobby會帶王浩信去風花雪月。現實中，這日Bobby就跟王浩信去桌球室，兩個大男人篤波之餘，天南地北什麼也講，出名搞鬼的Bobby說到興起時，竟然與王浩信上演「斷背情」，又講「囡囡」，所講的是王浩信3歲囡囡王靖喬，錄下一段重複唱着Bobby名字的可愛唱歌片段。
歐陽震華(Bobby)與王浩信於台慶劇《東坡家事》同樣飾演才子，性格及外形皆截然不同。問他們覺否對方是否擁有才子特性？Bobby說﹕「王浩信是一個才子樣，宜古宜今，再加以琢磨、修煉就更好。好多人會話新一輩演員誇張，表情、動作多，其實以前導師有教過演戲唔識over就唔識收，永遠驚被人話太多，或表情太過豐富，但過了這個階段就懂得收放，慢慢收斂就修成正果，如未去到哪個層次，不知道什麼才適合當時情緒，所以做多些並無問題。」
「演戲唔識over就唔識收」
王浩信說﹕「以前才子就吟詩作對，相對今時今日，對我們來講是『轉數』，我覺得Bobby是超級快，十足法拉利跑車，但他說已經無咁快，是部古董法拉利，我覺得他那一代轉數真的好快。例如劇中好多詩句，在他口中即時變得很時尚，好似唔古裝，原來咁又得。(做對手戲有否招架不住？)無，是抱學習心態。」
Bobby自嘲出道無觀眾睇
Bobby笑言沒有令王浩信招架不住，是大家互相提點，對方會教他擺靚甫士及唱歌。Bobby說﹕「他不唱歌很浪費，跳舞又得，真的遠睇似足郭富城。我20歲出道無觀眾睇，做什麼都無用，那時訓練班的人實在太勁，天分、潛質及勤力的都有，圍住我兩三期都勁，前面有劉德華，同一期有梁朝偉、周星馳、吳鎮宇，而下一期就有劉青雲、陶大宇，就算有人在旁推着你行都不及他們，那時又興靚仔，現在就可以接受我這個樣，那時獨孤一味靚仔、乖仔，我只適合做賊、死屍或強姦犯。不過，現在不是以貌取人，用樣子來定角色，是用內心、心路歷程來定，愈是靚仔愈是恐怖，哈哈！」王浩信感覺現在觀眾口味轉變，覺得他屬於靚仔，但要做強姦犯或死屍才有殺傷力，之前多齣劇更要死。
王浩信想齊齊爭視帝
劇中才子會去遊山玩水，Bobby透露在無錫拍攝外景期間，全組演員唯獨是他未入過市區逛街，皆因每日不是第一場就是第二場就有戲分。Bobby說﹕「外景拍出來的效果好好，看出來很有蘇東坡及泰少游那個年代的感覺，對劇集整體很有幫助，辛苦一點都是值得！」Bobby搞笑續道﹕「完成整齣戲後，大家都有約出來食飯，首播那晚因王浩信事忙無出席，因他現正受力捧，公司不捧他捧誰？哈哈，他今年才32歲，再簽10年才42歲，我都想簽50年，你都要簽30年。(是否要有飛躍進步獎才簽約？)是，如果想我簽50年，就頒個飛躍進步獎給我。今年我要避開王浩信，唔敢選最佳男主角。」王浩信連忙說﹕「唔好玩我啦﹗可以和Bobby一起提名就正，我入行時間較短，幸運地之前已攞過飛躍進步獎，如能夠今年和他、黃秋生及黎耀祥等一齊提名爭視帝就興奮。」
盼原班人馬拍續集
Bobby來年繼續為無綫拍劇，將與胡定欣合作新劇《一屋老友記》，他自嘲仍可以和不同年代花旦合作，感覺男人始終着數。Bobby說：「《東坡家事》裏我明顯比王浩信大約10年，叫我做東坡兄不會過分，不至於叫東坡叔。所以特別喜歡拍古裝，演繹出來比我真實年齡細10年至15年。」
王浩信大爆眾人有另一個計劃，就是原班人馬再拍續集，皆因這個組合拍得開心，好希望觀眾支持他們，令到有更好收視成績，繼而開拍新一輯故事。Bobby亦大表讚同，指近日出外食飯時聽到不少人大讚劇集好睇，看到演員間的默契，證明觀眾真的很聰明。
提到私人時間多數與男性朋去哪裏玩？Bobby忍不住說﹕「試過和男性朋友去游水，被拍下照片竟說我是『攣』，但我不介意，對方是我老婆細妹的丈夫，即是我的老襟，影出來就說我兩個『斷背』，最好笑外母睇到報道後打畀我老婆說﹕『哎呀，陰功，我兩個女婿都是基！』哈哈，其實外母不覺奇怪，得啖笑！」Bobby又開玩笑說寫他與王浩信是「基」也很正常，一定不會說是兄弟情，否則怎可能吸引讀者，即場作狀與王浩信來個激吻。
囡囡高歌「太陽Bobby」
男人聚會少不免會談到車、女人及事業話題。Bobby笑說﹕「我們兩個已婚就不講女人，不過就講囡囡，他的女兒唱了首歌給我聽，太陽Bobby！太陽Bobby！去咗邊！去咗邊！」Bobby隨即去拿出手機，交由王浩信解釋﹕「那時囡囡兩歲幾，我拍完《東坡家事》回家，她問我去了那裏，我就話同一個叫Bobby的哥哥開工，剛巧她當時正學唱《太陽爸爸》那首兒歌，突然之間改了歌詞唱出來，於是拍下傳給Bobby看，當時聽完即時high爆。」王浩信指女兒與Bobby仍未見面，由於返學要早睡，不能參加眾人聚會。
記者：梁榮達
攝影：孫華中
場地：金寶桌球
■更多娛樂猛料 ﹕ol.mingpao.com
