有人侍產 有人行山 國慶酒會邀請 泛民多沒空

有人侍產有人行山國慶酒會邀請泛民多沒空

[2015.09.18] 發表

【明報專訊】政府10月1日又會喺灣仔會展搞升旗禮及酒會。喺中聯辦主任張曉明發表「特首超然論」後，泛民同北京關係好僵，不過，泛民政黨包括公民黨、民主黨等都話已收到邀請，但唔係人人願意大清早去捧場，好似早前同京官食過飯嘅民主黨主席劉慧卿(卿姐)話，近年都好少去呢啲場合。公民黨郭榮鏗就大條道理，因為老婆呢幾日預產期，佢需要放侍產假陪家人。

公民黨主席梁家傑收到邀請，但佢目前身在外地，未知屆時去唔去。至於資訊科技界莫乃光就話，10月1日身處自由嘅土地，去咗台灣行山。民主黨黃碧雲就話一向唔出席呢類活動。啱啱退出民主黨嘅狄志遠亦話收到邀請，但未決定係咪出席。

CY擬邀赴粵卿姐：曾主席帶隊先啱

今年七一，梁國雄就破天荒無獲邀出席慶回歸酒會，搞到長毛好不滿，咁十一國慶政府究竟係咪會請晒所有議員出席呢？負責活動嘅民政局就答唔出，只係好官式咁講，「當局會按每個活動的安排及實際情况擬備適合的嘉賓名單，我們不會就名單作評論」。

出席國慶酒會只係禮儀活動，而噚日有報道話，特首梁振英(CY)有意喺年底，即區議會選舉之後，安排全體立法會議員去廣東考察。不過卿姐話未聽過呢件事，而佢無回鄉證，當然唔會參加；佢又扯到張曉明言論，好激動咁話，「香港係行三權分立㗎，使咩梁振英帶團，我反對呀，由大主席(曾鈺成)帶隊先至啱」。

CY跟自己友見面就簡單啲，Emily聞說CY會喺10月5日請建制派議員上禮賓府食晚飯，而呢餐飯本來約喺政改表決後慰勞大家，但推遲到10月先食。

更多港聞