田少論CY鍾國斌筆戰 指黨友發達啦
[2015.08.29] 發表
【明報專訊】指特首應「適度有為」冧泛民
特首梁振英(CY)同自由黨主席鍾國斌早前就「積極不干預」同「適度有為」筆戰，自由黨榮譽主席田北俊透露，最近黨內議員碰頭，都爭相笑鍾國斌(Felix)「你發達啦！」。因為平時根本唔係好多人識Felix，但特首長達3500字嘅文章6次點佢名，就為Felix帶來唔少報章報道，結果反而提高咗Felix嘅知名度。
田少上星期曾經同CY食飯，但佢認為特首應該「同泛民食吓飯，好過搵自由黨」。田少解釋，特首身為「香港一哥」，應該團結各界力量，特別係聆聽泛民嘅意見，「你同泛民食吓飯，冧掂佢哋，等泛民唔好喺立法會同你不合作運動，又要拉布，搞到我哋身為建制派又要喺度同你開會……點解你唔適度有為，同泛民溝通吓？」
引張震遠事件 批梁講一套做一套
田少又話，特首話「適度有為」，說法上並無大問題，但就問特首係咪「講一套做一套」，只有佢自己認為係啱嘅先「有為」。田少以政府處理行政會議前成員張震遠欠債事件為例，話特首曾經講過會徹查事件，但兩年後就「無咗下文」，問梁振英咁係咪反而應該叫「極度無為」咁話！
更多港聞
【明報專訊】抗戰勝利70周年，北京下星期四（3號）將會有盛大閱兵儀式，特區亦會有約300人嘅觀禮團。政府到今日仲未公布觀禮團名單，不過由於問...
詳情
相關新聞
