旺角站翻新 朗豪坊去旺角中心要兜路
[2015.08.07] 發表
【明報專訊】舊年大賺156億元嘅港鐵，噚日宣布開始新一系列嘅改善車站工程，當中人流極多嘅旺角站會大翻新。
港鐵車務營運副總監劉天成話，旺角站會喺今個月30號開始工程，車站大堂鄰近Ｃ同Ｄ出入口嘅閘外區域，會劃為已付費區。不過，呢個轉變會令市民以後唔能夠再喺車站地底大堂，直接由砵蘭街朗豪坊行去亞皆老街旺角中心，要改行地面或者兜路行，市民亦唔能夠再喺嗰個位等人或者交收物品。
擴建加電梯閘機 月底加班次
劉天成話，大堂合併咗之後可以騰出空間，加設3條新扶手電梯同兩個閘機，希望令大堂同埋車站月台嘅人流可以更暢順，目標2017年完工。
除咗旺角站，港鐵同時喺九龍塘站同鑽石山站增加扶手電梯、升降機等設施；火炭站大堂亦會喺今年第四季完成擴建。港鐵又總結今年上半年嘅列車表現，話上半年一共有5宗超過30分鐘嘅列車延誤個案，比起舊年上半年少3宗，因應延誤，港鐵根據可加可減機制要撥出600萬用嚟做明年中即日第二程九折優惠。
港鐵亦計劃喺本月29日起，每個禮拜再增加58班車，包括觀塘線加42班車、西鐵線加12班車同東鐵線加4班車。
更多港聞
【明報專訊】今年喺中華人民共和國成立66周年，工商界代表噚日開會成立工商界同胞慶祝籌委員會，邀請咗中聯辦副主任殷曉靜出席。殷曉靜噚日盛讚香港...
詳情
相關新聞
