CY兩笑泛民講錯嘢 阿基講錯8．31「方案」 陳志全話上「廣州」

[2015.05.29] 發表

【明報專訊】特首梁振英(CY)噚日出席立法會答問大會時與議員又有火花，佢先後兩度笑泛民議員講錯嘢，而泛民亦唔輸蝕，有人抗議離場。人民力量陳志全話，梁振英喺整個政改過程中嘅角色很詭異，總係搞破壞，就連行政會議成員、新民黨主席葉劉淑儀都話，答問大會的確有啲火藥味，不過具體係咩佢就唔方便具體評論喇。

泛民「紙鹿」陣迎梁蔣麗芸護駕

泛民「飯盒會」立法會議員噚日預備咗寫上「馬」字嘅紙鹿，放喺會議廳外夾道迎接被指將政改「指鹿為馬」嘅梁振英到場，點知有CY嘅fans、民建聯蔣麗芸(Ann)護駕，走埋記者咪兜，高呼「2017一定要得」！

梁振英喺Ann護駕下進入會議廳，一開始先講自己上任後嘅政績，由定「貧窮線」，到長者兩蚊搭小巴，有人搗亂學界辯論比賽頒獎禮佢都講埋。工黨李卓人首先聽到頂唔順，叫咗一句「梁振英指鹿為馬」，最後被主席曾鈺成趕出會議廳，而梁振英就好有興致咁話，其實「捉到鹿要識脫角」，現在就是脫角嘅時候。

梁：捉到鹿要識脫角

另外，民協馮檢基一時口快問政府會否收番「8．31方案」，梁振英一聽「8．31方案」，就哈哈大笑咗幾聲，然後指正8．31係人大決定，唔係一個方案，更唔係政府提嘅方案。人力陳志全講錯立法會議員周日去廣州見京官(應為深圳)，梁又再帶笑糾正，教對方廣州同深圳係兩個唔同嘅城市！

更多港聞