九巴司機揸正嚟做被起底
[2015.04.17] 發表
【明報專訊】巴士公司畀旗下員工及其家屬免費乘車好平常，咁搭其他巴士公司有無呢個優惠呢？
被指拒其他公司員工免費搭車
巴士迷近日喺facebook流傳一幅相，相信係有人喺一個新巴、城巴站頭，貼咗張紙，話有個九巴高姓車長，唔畀城巴同新巴員工及家屬「晒證」，要對方入錢。張紙內容係叫其他車長，如果見到呢名高先生同屋企人，就叫佢上車入錢，仲開晒全名同員工編號。有網民就迅速起咗佢底，貼咗九巴司機張相出嚟，話佢揸開屯門線。
好快又有網民話高先生連自己公司嘅員工證都「殺」，唔畀免費乘車，叫佢做「屯門殺證王」，仲開埋其他有同樣安排嘅車長個名。但有網民都認同高司機嘅做法，話「畀係人情，唔畀係道理，唔係下下都老奉囉！」
乜嘢人可以免費搭巴士？Emily就去問問，九巴發言人話，九巴員工同九巴家屬證持證人，搭九巴或龍運巴士時，出示有效證件先可以免費乘車。其他乘客，如果手持並非九巴發出嘅免費乘車證，就要畀錢嘞。
更多港聞
【明報專訊】Emily噚日講過，股市暢旺，唔少議員都有斬獲，本身係證券行老闆嘅金融服務界議員張華峰，相信更加盤滿鉢滿，連建制派議員都戥佢開心...
詳情
相關新聞
