25大旅遊城市 港排23
【明報專訊】旅遊網站tripadvisor選出2015年25大旅遊城市,香港今年榜上有名排第23位。Emily翻查前兩年嘅紀錄,香港當時仲未上榜。tripadvisor話香港有美味點心、景致怡人嘅島嶼,仲有秋水共長天一色嘅昂坪美景,呢啲「好嘢」令香港晉身25大旅遊城市。
今年排首位嘅旅遊城市係北非摩洛哥嘅馬拉喀什(Marrakesh),tripadvisor指該地到處都有市集、花園、皇宮同清真寺,旅客可以喺隱密庭院、蜿蜒巷弄中穿梭探險。排第二位係柬埔寨暹粒,第三位係伊斯坦堡(見表)。
tripadvisor介紹香港景點,除咗推介昂平,仲叫旅客不妨到赤柱一邊歎咖啡、一邊睇風景,又叫旅客去鑽石山志蓮淨苑、南蓮園池尋找內心平靜。
另外,香港海洋公園亦喜事重重,佢哋獲中國遊藝機遊樂園協會頒發3個獎項,包括「中國最受歡迎主題樂園獎」、「中國主題樂園最佳活動創新獎」及「中國主題公園行業領軍人物獎」,海洋公園話得獎肯定咗公園嘅設施、表演、遊樂有水平喎。