黃定光開會剪指甲
范國威投訴後被罵：佢講粗口

范國威（中、紅衣者）唔滿意黃定光（左二、灰髮者）喺會議廳剪指甲，兩個人之後喺走廊嘈交，保安要將兩人分隔開。（陳洛明攝）

【明報專訊】唔少人都覺得喺公眾地方剪指甲係一件好唔衛生、核突嘅事，但呢件事偏偏喺立法會發生。話說新同盟范國威(Gary)噚日開開吓會，突然聽到啲怪聲，原來民建聯黃定光(象哥)喺會議廳剪指甲，Gary發言時梗係炮轟象哥嘅行為。點知，隔咗無幾耐Emily就聽到Gary喺立會走廊質問象哥「你點解要講粗口鬧我啊」，搞到要保安隔開佢哋，最後兩人面左左，搭唔同?上樓返辦公室。

黃定光：我唔知咩叫粗口

Emily問象哥咩事，象哥好勞氣，反問「我指甲崩咗就要剪㗎啦」、「又關佢事，乘機借我嚟發揮」，象哥無回應用咗邊句說話鬧Gary，只係話「我唔知咩叫粗口」，又話只有Gary覺得嗰句係粗口喎！Gary就借「D7689」事件，話象哥句粗口其實係「D×你」喎。

另外，立法會內會噚日通過周三大會提早晚上8點休會，泛民只有公民黨、工黨、街工同李國麟贊成。

民主黨單仲偕發言時，質疑提早休會會減少議員發言空間，但建制派就質疑上周立法會流會，民主黨其實一個人都無坐喺會議廳。

社民連梁國雄即刻反駁﹕「你管掂你保皇黨坐35個人喺度咪唔會流會囉！」佢又批評部分人代政協一人食兩家茶禮，因為長毛喺未批准下發言，搞到被內會主席梁君彥趕出會議廳。

更多港聞

周浩鼎任民建聯副主席大熱 地區有反彈

【明報專訊】民建聯主席譚耀宗日前宣布4月換屆後唔再做主席，連同副主席蔣麗芸共同進退。雖然換屆話係選舉，但大家估計身兼行政會議成員嘅李慧琼會接... 詳情

民陣明遊行 賣「袋住先」利市封

【明報專訊】民陣聽日舉辦遊行，表明拒絕假民主、爭取真普選，計劃下晝兩點由維園中央草坪出發，由幾個喺佔領運動中被捕嘅示威者帶領，下晝4點到午夜... 詳情

常秘夫婦齊攞30年服務獎

【明報專訊】政務官（AO）圈子有唔少夫妻檔，當中表表者要數到常秘夫婦——發展局常任秘書長（規劃及地政）周達明（左）同財經事務及庫務局常任秘書... 詳情