齊昕爆父母多次叫刪fb 「想我低調啲」

齊昕爆父母多次叫刪fb
「想我低調啲」

[2015.01.30] 發表

【明報專訊】近日經常曝光嘅特首梁振英(CY)次女梁齊昕，首個電視專訪噚晚出街。齊昕透露，父母曾經多次要求佢刪除facebook戶口，「想我低調啲……唔想我咁癲、咁言行出位、咁crazy」，不過齊昕強調自己係孝順女，只係「內心孝順，外表激到佢哋(父母)心臟病」。

指自己內心孝順外表激心

齊昕早前接受有線《娛樂新聞》錄影專訪，並早已喺fb上載手持龍蝦鉗嘅短片，宣傳自己嘅專訪，睇嚟佢同啲網民一樣熱切期待。細細個去咗英國讀書嘅齊昕，接受訪問時中英夾雜，不過唔知係咪第一次亮相「公仔箱」，受訪時好似有啲緊張。

訪問中佢被問到以前喺facebook同網民罵戰，會唔會同父母商量，梁齊昕斷然話「唔會」，仲大爆父母多次要求佢刪除fb戶口，希望佢低調啲。自問好孝順嘅齊昕話刪除過一兩次，但最後都係重開。齊昕有提到對於父母嚟講，佢都幾麻煩，佢解釋細細個就去外國讀書，大家世界觀好唔同，「有generation gap(代溝)」，仲話自己睇法好開放，父母就好傳統，「媽咪好strict(嚴厲)」。

問家庭背景不滿朋友被judge

一講到因咩事會同父母嗌交，主持人請佢舉例，齊昕就笑住話有100個例子喎，其中一個係佢好不滿父母會judge佢嘅朋友，經常問朋友嘅家庭背景、父母工作、成績，係咪喺劍橋或牛津讀書。齊昕話明白父母想保護佢，但認為只要朋友真誠，就得啦。