【明報專訊】柯士甸路「六四紀念館」噚日舉行小說Closed Gate新書發布會，故事講述一個巴勒斯坦留學生對中國八九民運嘅感受，以天安門比對加沙嘅情况。小說作者Sayed Gouda喺1988至89年到北京留學讀中文，佢話小說內有虛構情節，但歷史內容絕對真確。 Sayed喺1980年代於埃及主修中文，幾經苦讀取得獎學金，1988至89年到北京交流。89年學生罷課初期，Sayed係少數上課嘅外國交換生，最後受朋友邀請踏上街頭加入遊行，用鏡頭記錄場面，當中一個9歲小童中槍嘅畫面叫佢至今難以釋懷。Sayed形容嗰一年係佢政治醒覺嘅一年，由以往不熱中政治，至體會到政治參與嘅重要，即使你唔鍾意政治，「政治會強行擠進我哋嘅生命」。 Sayed喺1992年移居香港，先後於城大攻讀博士學位及兼職教書。去年佢喺課室再次經歷罷課，角色由學生變成老師，「(2014年)9月學生搞罷課，我半班學生都無嚟，餘下嘅只有國內學生和交流生」。為表支持學生罷課，Sayed最後將出席率嘅分數「送」畀罷課學生。佢形容佔領區氣氛同北京好相似，嘆道不希望歷史重演，「但那只係一個換咗名字嘅中國政府，思維仍是一樣」。 嘆歷史重演 勸港人守住 Sayed話，同中國政府議價好困難，勸港人要守住立場、保持施壓，不能放棄。移居香港近20年，Sayed身分證有「3粒星」，返內地用「回鄉證」，佢即將去北京師範大學教書5個月，被問到會唔會擔心新書內容影響佢入境？Sayed聳肩回應﹕「唔知道，我希望過關一切順利吧！」
|
| |
| |
;){kind=small}
;){kind=small}
