【明報專訊】馬來西亞航空業今年好不幸，兩家航空公司嘅客機相繼出事。民建聯蔣麗芸(Ann姐)啱啱喺大馬返嚟，原來今年佢已先後兩次去大馬檳城，碰巧兩次去玩嘅時間，都發生空難事件，Ann姐都不勝欷歔，話希望早日尋回飛機，查明原因。

Ann姐同Emily講佢好鍾意檳城，所以趁假期去咗玩4日，前日發生亞洲航空航機失蹤事件，Ann姐喺facebook留言表示嘆息。佢話3月去檳城時發生咗馬航MH370失蹤事件，據講大馬仍然每日花錢去搵MH370。今次剛從檳城返港後，又有飛機失蹤。

Ann姐話，佢再去檳城係因為鍾意當地小城嘅平和、樸實、綠樹、海洋；喜歡參觀融和咗馬來西亞、英殖民地和傳統嘅中式老房子。Ann姐留言時不忘撐香港，佢話司機同佢講，香港地鐵好，話檳城提出建地鐵，講咗30年都未起；司機又讚賞香港福利、警察廉潔，廉政工作都做得好好，羨慕香港喎。

(蔣麗芸facebook)