零發言劉江華封「最佳」 網上選擇題：他存在為什麼？

零發言劉江華封「最佳」
網上選擇題：他存在為什麼？

[2014.10.22] 發表

【明報專訊】噚晚6至8點嘅政府與學聯對話，Emily與行家及不少朋友都買定快餐，邊吃邊睇呢場「世紀對談」，有網友仲話睇波都無呢場咁緊張。不過，Emily發現最吸引大家注意及網上留言嘅，唔係Alex周永康、唔係Carrie林鄭月娥，而係喺兩小時對談中一粒聲都無出過嘅政制及內地事務局副局長劉江華，同埋特首辦主任邱騰華嘞！

與學聯對話邱騰華都無出聲

對談期間唔少網民網媒金睛火眼，「半場」左右已留意到「雙華」仲未講過嘢，去到「中場」已經高呼要求劉江華發言；接着網民「熱烈地彈琴熱烈地唱」式留言，話「劉江華講得最好」、係「表現最多的一個」，又有人極速惡搞會談圖片，如配以「又話不設現場觀眾席？」等字眼，揶揄兩人如觀眾，或製作劉江華心想「幾時放飯」等設計對白。

去到會談尾聲，有人相信劉江華發言嘅願望會落空，決定畀佢DSE聆聽能力測驗滿分，又模擬設問「請問劉江華的存在是為了什麼？」，可選答案有﹕(A)等食飯；(B)湊人數；(C)考Listening；(D)做觀眾等拎康康同暉暉(岑敖暉)簽名等，Emily相信呢條Q好多人都「答中」。

劉兆佳：無話個個要發言

前新聞統籌專員何安達表示，政府隊伍內有人無角色，喺觀眾眼中可能有負面影響，認為政府派出3個人都可以，唔發言嘅兩人變得有啲無謂。不過，全國港澳研究會副會長劉兆佳就話，無話個個都要喺會上發言嘅。