新論壇佔中民調負面選項多

【明報專訊】建制派組織新論壇上月初就港人對人大決議嘅意見做民意調查，Emily噚日收到新論壇新一輪調查電話，主要問佔領中環行動，包括提到警方用催淚彈驅散示威者，人群之後阻塞其他地方等，問受訪者對示威者行為有咩意見。不過，提供畀受訪者嘅選項就有啲奇怪，有「反對佢哋嘅行為」，「支持佢哋嘅行為」，同「唔支持但同情佢哋嘅行為」等，似乎負面嘅選項比正面嘅選項多。

新論壇副召集人、觀塘區議員鄧咏駿話，其實所有民調都有好多唔同問法，佢哋會公開原本數據，畀大家參考，亦會講明新論壇問嘅問題同港大、嶺大等問題有咩唔同。佢明白問題未必人人滿意，建議收到電話嘅人如果唔想受訪可以收線。

新論壇其他問題仲有佔中參加者嘅主要訴求，受訪者有無去圍觀佔中，覺得示威者係咪自發等。鄧咏駿話，做民調係希望了解透徹佔中參加者嘅想法，咁先可以搵出各方都可接受嘅解決辦法。