灣仔碼頭最後一夜
結束半世紀任務

灣仔碼頭噚晚11點開出最後一班往尖沙嘴渡輪，正式結束46年服務，大批市民分別喺渡輪上及碼頭上紀念這一天。（鄧宗弘攝）

市民無分男女老幼，都齊齊喺灣仔碼頭內拍照留念。（鄧宗弘攝）

唔少市民噚日專誠到灣仔碼頭懷緬，戴先生帶同囝囝同爸爸三代人搭船，回味昔日坐渡輪穿梭維港嘅時光。（鄭穎瑩攝）

灣仔舊碼頭（左圖、資料圖片）噚日最後一日使用，今日起渡輪喺新碼頭（右圖）繼續服務。（胡景禧攝）

【明報專訊】為配合灣仔發展計劃第二期工程，灣仔海旁嘅灣仔碼頭，噚晚11時尾班船開出之後，就完成46年嘅歷史任務，由填海區嘅新碼頭取代，舊碼頭將會清拆。噚晚，大批乘客到碼頭影相回味昔日時光，不少人搭船喺維港來來回回，亦有一家三代人一齊嚟搭船。有水手對碼頭拆卸甚感可惜，嘆新不如舊。

坐落會議道嘅灣仔碼頭1968年啟用，用嚟取代原本喺杜老誌道同史釗域道嘅碼頭。當時未有海底隧道，唔少打工仔返工放工都靠渡輪。告別灣仔碼頭後，日後港島區稍有歷史價值嘅碼頭建築物，就剩番1980年代因東區走廊興建而改建嘅北角碼頭。

逾百人歡送 慨嘆新不如舊

來往灣仔至尖沙嘴嘅渡輪服務，由今日首班船開始，搬到隔籬嘅新碼頭繼續營運，市民可沿舊碼頭旁行人路步行去新碼頭。渡輪營辦商已喺灣仔同尖沙嘴渡輪碼頭，透過通告通知乘客。

噚晚有過百人去歡送灣仔碼頭，碼頭內外迫滿嚟影相留念嘅市民，佢哋尤其鍾意喺舊式跳板上留影。戴先生帶埋囝囝同爸爸三代人來搭船，佢話細個時爸爸經常帶佢嚟搭船，一搭就搭咗幾十年；?家成家立室，噚晚返嚟回味碼頭。不過，佢就話新碼頭比較遠，位置唔方便，亦無咗嗰份親切感。有水手亦同Emily講，覺得舊碼仲靚，又有特色，慨嘆城市要發展，但就新不如舊。

更多港聞

民主黨創意橫額 抗「袋住先」廣告

【明報專訊】政府賣廣告唔使錢，日日宣傳「有票，真係唔要？」，Emily聽聞，政府嘅輿論攻勢唔會停，喺人大常委公布香港政改框架後，政府會繼續新... 詳情

李國能陳志海歎咖啡

【明報專訊】人大常委聽日將正式為政改方案定下框架，政界瀰漫着一陣悲觀情緒。Emily噚日喺金鐘飲咖啡時，咁啱見到終審法院前首席大法官李國能同... 詳情