奧脫福「禁Pad」 紅魔躉dislike

[2014.08.14] 發表

一機隨身，世界通行，無論去到邊度先要打卡Selfie是常識吧！不過將於周六英超開鑼戰打頭陣迎擊史雲斯的曼聯，新球季向「米飯班主」頒下「禁Pad令」，嚴禁球迷攜帶平板電腦進入奧脫福觀賽。表面為免機影處處阻礙球迷睇波，實則是防範球迷偷拍比賽片段，令不少紅魔躉未開波先dislike。

礙觀賽違版權

曼聯新球季改由軍紀嚴明的尹戈爾領軍，不只接連推出辣招措施治魔，就連球迷睇波也規矩多多。尹戈爾前日首度於奧脫福主場督師友賽華倫西亞，買了飛捧場的球迷均收到曼聯電郵，提醒他們除了煙花、玻璃樽、刀仔等例牌違禁危險品不可帶入場外，連尺寸超過15厘米×10厘米的平板電腦，也於新球季被列為奧脫福「禁物」。

曼聯解釋是為免球迷掛住舉機，阻礙後排觀眾睇波；不少球迷熱愛將場內片段左拍右拍放上網分享，亦都令牽涉龐大版權費用的電視轉播商「詐型」，曼聯此舉可以說是一箭雙鵰。

「禁Pad令」一出，不少買了曼聯季票的紅魔網民也議論紛紛，有球迷大呻欠了iPad「揸手」，總是若有所失；而且球迷話晒也是「米飯班主」，禁令多多難免令人dislike。不過也有網民力撐紅魔禁Pad有理，皆因畀錢入場也是為了睇波，難道望住個iPad會清楚過直接望球場？

美職棒隊曾禁　2年後取消

其實早在2010年，美國職棒球隊紐約洋基已在球場頒下「禁Pad令」，卻因惡評如潮而於兩年後取消。

今年世界盃也列明禁止球迷攜帶平板電腦入場，球場保安卻未見嚴格執行。正所謂道高一尺魔高一丈，現在的平板電腦愈出愈「的骰」，而手機同樣可有錄影功效，要在球場Selfie打卡其實唔難，只要朗尼及尹佩斯等紅魔兵踢出好波，球迷自然專心睇波無暇望「芒」！

更多體育二