梁志堅拒答有否外國護照
5商會開記招反佔中
[2014.07.29] 發表
【明報專訊】建制派「反佔中」聲勢凌厲，除咗聲稱收咗逾90萬個簽名外，噚日五大商會亦聯合開記者會，一齊表明反佔中。佔中或反佔中嘅人成日話愛香港，咁究竟佢哋係咪「外國人」先？5商會代表噚日反佔中就滔滔不絕，但被問到佢哋有無外國護照時就有啲扭擰，其中地產建設商會梁志堅被追問時就黑面發火，反問記者點解要問呢個問題，又話呢個係私隱，唔回應。
4人回答 梁稱屬私隱
近日支持或反對佔中嘅人都被質疑唔係真心愛港，好似真普聯召集人鄭宇碩有澳洲籍，被人笑佢「澳洲碩」，而幫港出聲召集人周融有居英權，被指「英國人」。噚日五大商會領導齊集，記者就關心吓佢哋有無外國護照，工業總會主席劉展灝同總商會主席彭耀佳都話自己係香港人、「揸香港身分證」，只有特區護照。
5個商會代表中，梁志堅以私隱為由唔肯回應，佢被追問時，反問記者點解要問呢個問題，究竟目的係咩，佢話自己代表商會，唔係個人身分，唔需要回應。近日官員話自己以「個人身分」簽名反佔中，商會代表就話自己唔係以個人身分，唔知市民會否有啲混亂？
周融：已找律師研「完全放棄居英權」
另一邊廂，前日先話「居英權無得放棄」嘅周融，被網民連日狙擊後，噚日話已指示律師研究放棄居英權方法，周融話，若因「政治理由」放棄居英權，之後都可以申請番。唔知自己放咗居英權張Cert(文件)去邊嘅周融，話正搵律師研究點先可以「從此真正完全放棄居英權」。
Emily問過英國總領事館，其實放棄居英權填張表格申請就得，費用144英鎊。而取消居英權後，無錯係可以申請番，但就要具有力理由。
更多港聞
相關新聞
