【明報專訊】社運人士楊匡(圖)早前捲入民間電台非法廣播官司，噚日被裁定所有控罪唔成立。打贏官司嘅楊匡笑住咁行出法庭，心情好靚，原來佢要宣布一個更大嘅喜信，就係老婆劉沙沙有喜！即將成為爸爸嘅楊匡笑得好甜咁話，以後要實行「BB優先」，多啲時間畀屋企，不過，佢強調唔會放棄參與社會運動。

話「BB優先」 不棄社會運動

劉沙沙今年5月曾經食咗一次「詐糊」，當時楊匡話，對於生BB無時間表，而佢主力係關注內地人權同良心犯。但係事隔唔夠半年，佢老婆就有咗。楊匡話自己好興奮，又話老婆𠵱家喺內地安胎，預產期係下年8月5日。不過，佢投訴內地政府對老婆申請來港探親諸多刁難。

楊匡話，將來要調配好啲時間，實行「BB優先」，要多啲陪屋企人，不過，佢話唔一定會因為生咗BB而有所顧慮，將來仍然會積極投入社會運動。