【明報專訊】倫敦市長Boris Johnson日前訪港，繼坐直昇機遊機場後，噚日與傳媒齊齊坐天星小輪，又喺鬧市乘搭倫敦運來港嘅新款混能巴士；之後同英商午宴以及會晤特首梁振英。被問到係咪支持香港推行普選，佢拒絕評論，話自己不知情亦不想捲入呢個話題，今次嚟係為學習香港嘅「做得到精神(can do spirit)」咁話。

鬧市搭倫敦混能巴

Johnson 噚日朝早9點幾坐巴士到灣仔碼頭，同傳媒再坐小輪來回灣仔同尖沙嘴，仲一度將頭伸出船外揮手拍照。有記者問佢點睇香港推行普選，佢話唔想捲入(don't want to get involved in)呢個話題，認為決定權應交予香港市民。

力推喺倫敦泰晤士河口填人工島建新機場嘅佢，日前參觀香港國際機場，話今次嚟係為學習香港嘅「做得到精神」，又話現時想加密雙邊航班，但因倫敦希斯路機場爆滿無法實行，所以希望將香港建人工島機場嘅經驗帶番倫敦。