【明報專訊】全港納稅最多嘅單一機構馬會，噚日公布2012年度業績，過去一年無論係投注額同繳稅額都再創新高。喺跑馬仔即賽馬總投注額有943.7億元，創下1996年度以嚟新紀錄，繼續成為馬會主要收入來源。不過，六合彩全年總投注額就比上年度跌咗0.9%，有76.3億元，馬會估計可能係同巨額金多寶攪珠數量少咗有關。 賺得多，當然交稅愈多，馬會上年度交畀政府嘅博彩稅同利得稅總額，達到破紀錄嘅176.4億元，佔稅務局全年稅收總額7.3%，其中賽馬博彩稅就交咗111.1億元，係自1999年度以嚟最高紀錄，至於馬會全年純利就有41.2億元。另外，馬會透過慈善信託基金作出嘅慈善及社區項目捐款亦刷新紀錄，有19.5億元，比上年度嘅17.3億元增加咗12.8%，捐款項目數量達160項，都係歷年之冠！
|
| |
| |
