【Emily】黃傑龍評財案句句有骨：救飲食零售短期方案接近冇
[2025.03.01] 發表
【明報專訊】《財政預算案》日前出爐，各界有唔少反應。經營叙福樓飲食集團嘅優質旅遊服務協會主席黃傑龍(圓圖)都喺社交媒體嘮叨，話佢曾就推動市民消費提出意見，「好明顯我呢個意見並冇被採納(其實我都預咗)」，大嘆預算案提及刺激經濟嘅內容似乎比較長遠宏大，「針對餐飲零售呢啲即時需要所謂救命嘅短期方案，似乎接近冇」，仲推斷政府已下定鐵心，唔會再對餐飲零售呢啲本地消費行業推出短暫或即時刺激措施。
話如魷魚遊戲鬥耐唔死
黃傑龍話內地同澳門都有搞消費大獎賞等活動鼓勵消費，佢建議預算案推出針對措施，例如電子消費券或特別購物優惠，鼓勵留港消費，不過結果大家都睇到，佢奉勸想喺香港開展餐飲零售業嘅朋友，首先要問自己明唔明白香港現時嘅政策方向，有冇足夠資金實力打持久嘅淘汰戰，喜歡接受挑戰又唔鍾意做容易賺錢生意嘅人，先至好投資餐飲零售業，「因為勝出嘅方法就係捱到最後唔死。魷魚遊戲」。
佢又話呢幾日聽到網上或者坊間對預算案嘅反應，多數係表達「失望、憤怒、有冇搞錯、唔係呀嘛」，當然偶然都聽到正面反應，例如「 OK啊，算係咁啦，冇所謂啦，可以接受」。至於佢自己？佢就話無謂多講喇。
更多港聞
【Emily】藝術節開幕 李家超趁機宣傳體育園
【明報專訊】第53屆香港藝術節噚晚開幕，今屆有超過45套精彩節目、125場演出。主禮嘅特首李家超（台上前排中）致辭尾聲時，趁機「宣傳」今日開... 詳情
【Emily】何永賢做飾物模特 撐房會青年創業店
【明報專訊】房委會舊年推出「共築．創業家」計劃，旗下商場部分舖位免租7個月租畀年輕人創業。房屋局長何永賢噚日出席預算案記者會時親身幫計劃賣廣... 詳情
相關新聞
