【Emily】民建聯盆菜宴 日領事試舞獅

[2025.01.25] 發表

【明報專訊】唔同政黨都嘗試擴展對外聯絡關係，民建聯都趁新春將至，同30幾名外國駐港領事館及外國商會代表去大埔食盆菜、寫揮春同體驗舞獅。Emily留意到，上任無耐嘅日本駐港總領事三浦潤同個別西方國家領事館代表都有出席，三浦仲一試舞獅頭；同場仲有中國外交部駐港特派員公署參贊包海斌。

民建聯主席陳克勤就即席揮毫，用毛筆寫「福」、「大吉」等字，亦有外國代表即場試寫中文揮春。民建聯副主席兼聯絡拓展委員會主席周浩鼎就同嘉賓介紹泰亨文氏宗祠起源，同相傳盆菜係當年文天祥同南宋皇帝南下避蒙古軍時，村民用嚟表達敬意嘅典故。

民建聯會務顧問李慧琼就話，盆菜象徵團結與合作，呢啲價值觀對社會進步至關重要。佢形容今次仲加深各外國代表認識中華文化底蘊，期望聽到商會對新一份《財政預算案》嘅意見。

更多港聞

【明報專訊】政府成立嘅「發展旅遊熱點工作組」預期今年上半年制定推進項目，民建聯同工聯會先後見過工作組組長、副政務司長卓永興，噚日就同一時間喺... 詳情

【明報專訊】本港漁農業被視為式微行業，但唔少有心人仍然覺得有得發展，選委界立法會議員、新民黨副主席容海恩上個月就聯同漁護署代表、業界選委代表... 詳情