【Emily】人大常委會會議今開鑼 李慧琼盼謝海關總署 鄺美雲首列席
[2023.12.25] 發表
【明報專訊】聖誕節於香港係普天同慶嘅假期，內地就工作依舊，全國人大常委李慧琼噚日就去北京，準備出席今日至29日舉行嘅第十四屆全國人大第七次常委會會議。今次會議仲有港區人大代表陳勇同鄺美雲列席。李慧琼話，今次除咗開會審理法律草案，佢想爭取喺北京與國家海關總署嘅領導會面，感謝海關總署早前接納全體港區人代聲音，取消咗「出入境健康申明卡」嘅規定，方便大家出行。
李慧琼話，今年最後一次常委會，議程都唔少，包括6部法律草案、8個議案及16個報告，其中有審議國務院關於國民經濟和社會發展第十四個五年規劃，和2035年遠景目標綱要實施中期評估報告、關於2022年度中央預算執行和其他財政收支審計查出問題整改情况嘅報告等。
明年3月就係十四屆全國人大第二次會議，李慧琼話民建聯喺11月已經向選委發信徵求人大建議嘅題目，例如探討恢復內地客來港「一簽多行」、消除兩地文物交流障礙等。鄺美雲就話佢喺今屆大會第一次列席，感覺責任重大，要多聽多學習，多了解國家發展最新情况。
更多港聞
相關新聞
