【Emily】為包山變掛畫「解畫」 值理會:承辦商加錢都唔做
【明報專訊】因新冠疫情停辦3年嘅長洲太平清醮飄色巡遊同搶包山比賽周五(26日)復辦,但長洲太平清醮值理會前日喺facebook話,負責製作3座高約45呎大包山嘅承辦商以人手同時間為由,未能承辦製作大包山,大會今年會以3幅印有包山圖案嘅大型掛畫取代。值理會主席翁志明噚日同Emily話覺得無奈同可惜,「佢(承辦商)唔做都冇計」,今年仍會擺放由值理會整嘅3座只得15呎高嘅細包山。
翁志明話,整大包山嘅承辦商今年3月底話唔夠人手,加上整包山嘅物料已停用3年,需要重新製作同加價。翁話曾經提出加多4萬元,令3座包山嘅造價加到13萬元,但承辦商都係唔肯做。佢又話曾經搵過第二間承辦商,但只能做到十幾呎嘅包山,所以最後決定以大型掛畫取代。冇咗3座大包山,翁話今年會擺放3座由值理會斥資十幾萬元整嘅15呎高細包山,放喺掛畫前,細包山上嘅平安包會喺周六(27日)派畀大家。
仲有小包山 搶包山賽唔受影響
Emily問翁,如果承辦商下年都唔做大包山咁點算,佢話會諗計,「睇吓搵咩替代」,而佢估計承辦商日後都未必想再做包山。至於搶包山比賽嗰座包山,翁話係用鐵架搭建,所以比賽唔會受影響。