【Emily】「議員電梯」擴建停用 立會貼指示牌鼓勵行樓梯
[2023.04.01] 發表
【明報專訊】立法會做緊擴建工程，其中3部俗稱「議員電梯」嘅𨋢聽日開始停用至11月，以擴建成4部𨋢，並加建到14樓，議員如果想由5樓至8樓嘅辦公室去1樓會議廳開會，暫時就要去大樓另一邊嘅另外4部𨋢。為咗疏導人流，民建聯陳克勤就喺行管會提議，開放後樓梯畀大家用，秘書處噚日喺大樓貼咗唔少告示，指示後樓梯方向，仲好似行山徑指示牌咁，列明去會議廳或會議室嘅距離同需時。
立法會主席梁君彥同秘書長陳維安、副秘書長衛碧瑤噚日一齊試行幾層，梁君彥話樓梯已打掃乾淨，通風良好，相信大家會行得開心，仲希望成為議會文化。
梁君彥盼行樓梯成議會文化
陳克勤噚日都行過，大讚秘書處喺走廊告示貼咗唔少卡通同健康標語，佢最鍾意係「行多D！健康D！」一句，又語帶雙關話黨主席李慧琼最鍾意「一層減5卡，心肺功能加」呢句，仲問：「點解？大家明啦！」
更多港聞
【明報專訊】大灣區共同家園青年公益基金及德天社會企業聯合推出「藝術欣賞體驗計劃」，培養學生對欣賞及參與藝術創作嘅興趣。多個本地藝團今年6、7...
詳情
相關新聞
